IBU, GURU MANGSA PANDEMI

 

Wis pirang-pirang sasi lumaku, pasinaone bocah sekolah amung ing ngomah wae karo ibu. Tugas ibu saya tambah sing adate mung masak, umbah-umbah, resik-resik omah, saiki katambah dadi guru private bocah-bocah. Pancen ora ana jenjang pendidikan khusus kanggo profesi iki, yaiku dadi Ibu. Nanging ing mangsa iki, Ibu kudu nguwasani maneka warna bidang ilmu. Abot tanggung jawabe, tugas sekolah diparingake kanthi dalan daring gelem ora gelem ya kudu dilaksanakake. Pancen akeh tantangane, kanggo Ibu sing putra-putrane isih sekolah ing tingkat TK lan SD mesthi wae beda karo Ibu sing putrane ing tingkat SMP lan SMA.

Kanggo ibu sing putrane isih TK lan SD, umure bocah durung cukup menawa didhawuhi sinau dhewe lan dicekeli HP tanpa pendampingane wong tuwane. Ibu kudu ngontrol bocah-bocah nggunakake HP kanggo srana sinaune. Menawa ora dikontrol bisa njedhul masalah anyar, yaiku bocah-bocah tuman dolanan HP. Menawa ibune mligi ibu rumah tangga, jadwa sinaune bocah bisa manut jadwal kang diparingake sekolahane. Bab kuwi ditindakake supaya anak tetep disiplin migunakake wektune.

 Nanging kanggo ibu sing kudu nyambut gawe ing njaba wayah sekolah lan ora bisa nunggu putrane sinau ing wayah isuk. Ibu bisa ngatur waktune kanthi cara gawe jadwal sing kudu dilaksanakake bocah-bocah, iki uga bisa nglatih karakter bocah yaiku tanggung jawab. Kudu cetha kapan bocah-bocah kudu dolanan, ibadah, lan ora lali turu awan amarga menawa jadwal iki ora ditindakake bisa pengaruh konsentrasi sinaune ing wayah bengine. Sinau karo bocah TK lan SD, Ibu kudu sabar ngalahi maca materi lan nerangake meneh marang putra-putrane. Menawa ana materi sing kurang dipahami dening ibune, ibu bisa langsung nyuwun piterangan marang guru kelase, utawa bisa browsing ing HP pintere. O iya ibu bisa ngajak putrane sinau lifeskill, ora kudu jumbuh karo kurikulum sekolahan. Diajak sinau sinambi dolanan utawa praktik sederhana ana ing ngomah supaya bocah-bocah ora bosen mung sinau ing nghomah.

Lha menawa putrane wis SMP lan SMA, Ibu kudu menehi pangerten marang putra-putrane bab tanggung jawab lan kebutuhane bocah. Bocah SMP lan SMA wis ora patia butuh diterangake bab pelajaran dening ibune. Amarga bocah umur telulasan tahun wis wiwit konsentrasi lan ngerti carane piye menawa durung paham bab materi sing lagi disinaoni. Nanging kontrol saka Ibu dibutuhake banget, akeh bocah-bocah sing mung ngapusi wong tuwane. Ing kamar katon serius, tibake mung ngegame online ora ngerti wayah. Tugas sekolah uga ketheteran, ora padha digarap. Lha kok nggarap, bukak materi utawa mlebu kelas online wae padha wegah. Wis ngono menawa kuoatane entek, jaluk ditumbasake wong tuwane nganggo alesan sinau online. Mbok menawa iki masalah umum sing diadepi ing masa pandemi. Nanging minangka wong tuwa ya kudu tegas, bocah-bocah dilatih disipin lan tanggung jawab. Dadi wong tuwa tetep menehi kalodhangan dening putrane kanggo ngegame, nanging kudu ditegasake bab tanggung jawabe nggarap tugas sekolahe lan aja nganti lali wektu ngibadahe.

Ibu pancen kudu cerdas ndudut atine putra-putrane, carane ya dijumbuhake karakter putrane dhewe-dhewe. Menawa ibu bisa dadi mitra lan guru kanggo putra-putrane mesthi wae pendidikan siswa ing mangsa pandhemi iki bisa dilewati kanthi lancar lan ora mleset saka tujuan pendidikan Nasional. (Ayomi Palupi Irawati)