Impiku ora mung kembang turu

Salatiga, 10 Januari 2017

Duk ing kuna ingsun wis nate matur

Marang bapa biyung

Napa kula saged?

Napa kula nggih patut?

Gadhah impi ingkang inggil

Ingkang inggilipun ngantos gegana?

Bapa biyung ngendikan

Apa wae Le  impimu kuwi?

Bapa biyung tansah dedonga kabeh diijabahi

Nanging aja mung kembang turu jroning impi

Impimu iku rak gegayuhanmu

Mula usahakna tenan ing uripmu

Emas picis raja brana wanita uga tahta

Iku kembange impen ing donya

Bisa mbok duweni

Kanthi tememen anyambut kardi

Kabeh ora ana gunane manawa sira ra gelem donga

Nyedhak kro Sing Maha Kwasa

Merga iku kabeh mung fitnah donya

Manawa ora dilandhesi iman lan takwa

Wong kuwi kabeh ra ana gunane manawa wis dadi bangke

Para Dwija

Dina buda iki

Wayahe wisan gawe

Aku age-age munggah ana kene

Netepi jejibahanku kaya adate

Bocah bocah padha ibut karepe dhewe

Dak deleng...

Lha kok panggah ora budidaya anteng

Pancen bocah-bocah saiki ora predhuli kahanan

Dwijane padha usaha kanti tenanan

Nanging padha sekolah ra ngerti tujuwan

Mangkat mulih mung kanggo gugurke kewajiban

Diwenehi garapan ya ora kalaksanan

Aku mung isa ambegan

Ngadheg ing ngarepan

Karo mesem ngujiwat takon bab pelajaran

Uga mbaleni olehku kekandhan

Muga olehku  bola bali mangkene

Ing akhire bisa guna ing uripe

Wasis sakabehe ing tembe mburine